Xiddiga khadka dhexe uga ciyaara kooxda Liverpool iyo xulka qaranka Argentine ee Alexis Mac Allister ayaa soo jiitay indhaha kooxda Real Madrid kadib markii uu soo bandhigay qaab ciyaareed cajiib ah.
Laacibka, oo ka mid ah shaqsiyaadka waa weyn ee Liverpool, ayaa waxaa isha ku haya kooxda cadcadka oo doonaya in ay ku xoojiyaan khadkooda dhexe.
Si kastaba ha ahaatee, xiisaha Madrid ma noqon doono mid si fudud u hirgala, maadaama Liverpool aysan dooneyn inay xiddigooda ku fasaxaan wax ka yar 100 milyan oo Yuuro.
Xiddiga heerka caalami ee dalka Argentine, wuxuu Liverpool kaga biiray Brighton, isagoo si dhaqso ah ula qabsaday kooxdii Jürgen Klopp, oo uu hadda maamulo Arne Slot.
Awooda uu u leeyahay ka ciyaarista dhowr boos oo khadka dhaxe ah iyo aragtidiisa ayaa soo jiidatay Real Madrid.
Intaa waxaa dheer, Mac Allister wuxuu si fiican kaga shaqeyn karaa daafaca hortiisa iyo sidoo kale booska lambarka 10aad ee weerarka.
Xiisaha Real Madrid uma badna mid ay si fudud ku aqbali karto Liverpool oo lafteeda raadineysa saxiixyo dheeri ah oo khadka dhaxe ah.
